LENANE LA DITENG
TSEBE
Matseno -------------------------------------------------- 1
Maikaelelo -------------------------------------------------- 2
Mabakamagolo -------------------------------------------------- 2
Ditheo tse di kaelang -------------------------------------------------- 3
Tiriso ya Semolao -------------------------------------------------- 3
Boanamo jwa tiriso -------------------------------------------------- 3-4
Badirelwa, dikwalo le ditshenyegelo --------------------------------------- 4-6
Tiragatso -------------------------------------------------- 6
Mabaka a kamogelo -------------------------------------------------- 7-8
Thulaganyo ya kamogelo ya dikwalo -------------------------------------- 8-9
Thomelo ya ditokomane kwa ntle ------------------------------------------- 10-13
Ditlhokego tsa bafetoledi ba ba ikemetseng ------------------------------- 13-15
Taolo ya boleng -------------------------------------------------- 15-16
Tsamaiso ya dituelo -------------------------------------------------- 16-17
Tlhabololo -------------------------------------------------- 17
Lenanefoko -------------------------------------------------- 18-19
MATSENO
Dikaelo tsa Pholisi: Bofetoledi le Botseleganyi di dira tshiamelo e e lolameng ya go dirana le dikwalo tse di romelwang Tirelo ya Bosetšhaba ya Dipuo (NLS) le diyuti tsa puo (Di-LU) tebang le go fetolelwa, go tseleganngwa le go sekwasekwa mo dipuong tse di 11 tsa semmuso le dipuo tsa kwa ntle ga naga tse di kopiwang ke badirelwa. Di NLS/Di-LU di tla tlamela tirelo e go kgontsha mafapha otlhe a mmuso go diragatsa maikaelelo a Letlhomeso la Pholisi ya Bosetšhaba ya Dipuo (NLPF), e leng go -
tsweleta tiriso e e lekalekanang ya dipuo tse di 11 tsa semmuso;
bebofatsa phitlhelelo e e lekanang mo ditirelong tsa mmuso, kitso le tshedimosetso;
netefatsa paakanyo ya dipuo tsa semmuso tsa fa gae tse pele di neng di kgaphetswe kwa thoko;
tsweletsa tsamaiso e e siameng ya dipuo tebang le tirelo e e bokgoni ya tsamaiso ya ditirelo tsa setšhaba go fitlhelela ditsholofelo le ditlhokego tsa badirelwa.
Tiragatso ya NLPF ka iketlo e kaya gore go batlega ga ditirelo tsa phetolelo go tswa le go ya kwa dipuong tsa semmuso go tla tswelela go oketsega. Ka jalo Dikaelo tsa Pholisi di botlhokwa mo tsamaisong ya thulaganyo ya phetolelo le go sireletsa dikgatlhegelo tsa badirelwa le bafetoledi.
Tirisano ya lefatshe lotlhe ka bophara (Globalization) e lerile koketsego mo go batleng diphetolelo go tswa le go ya kwa dipuong tsa dinaga tsa kwa moseja. Tlamelo ka diphetolelo tsa go nna jalo go tokafatsa tlhaeletsano magareng ga Aforika Borwa le dinaga tsa kwa moseja le go tsweletsa dikamano boditšhabatšhaba. Ka jalo go tshwanetse ga nna le thulaganyo e e bokgoni ya tsamaiso ya ditokomane go netefatsa tlamelo ya diphetolelo tsa boleng jwa maemo a a kwa godimo ka nako.
MAIKAELELO
Maikaelelo a magolo a dikaelo tse tsa pholisi ke go netefatsa tlamelo ya ditirelo tsa boleng jo bo kwa godimo go kgotsofatsa ditsholofelo tsa badirelwa , le go tsholetsa tebego le maemo a badiri ka puo botlhe ka nako e le nngwe.
Pholisi e, e ikaeletse go tlamela dikaelo ka ga -
phetolelo ya selegae, botseleganyi le tshetsheko ya dikwalo;le thomelo ya dikwalo kwa ntle go fetolelwa, go tseleganngwa le go sekasekiwa.
MABAKAMAGOLO
Tiro ya puo ga jaana e dirwa mo maphateng a setšhaba le maphata a poraefete, le gale ka mokgwa o o sa tlhomamang. Ga go na thulaganyo ya go tlhokomela maemo a ditirelo tse di tlamelwang, le fa e le mokgwa mongwe wa go lekanyetsa bokgoni jwa badiri ka puo. Godimo ga moo, ga go na mokgwa o o tlhamaletseng le o o tshwanang wa go tlhopha bafetoledi. Ka ntlha ya se, go setse go itemogetswe mathata a a rileng. Ona a akaretsa diphetolelo tse di bokowa, go tlhoka bokgoni, tlhokego ya mafaratlhatlha go lepalepana le topo, le maemo a a kwa tlase a badiri ka puo.
Dikaelo tse tsa pholisi gape di ama bonnyane jwa ditlwaelo le maemo a a amanang le katiso, katlanegiso ya borutegi le kwadiso ya badiri ka puo, tsotlhe tse di botlhokwa mo taolong ya porofešene. Dikaelo tse di tlhagisitsweng mo le di amana thata le bofetoledi, botseleganyi le tshekatsheko ya ditirelo tse di NLS, fela di ka nna tsa dirisiwa ke di- LU go tlhama letlhomeso la ditiro le le laolegang sentle.
DITHEO TSE DI KAELANG
Pholisi e e ikaegile ka ditheo tse di latelang:
Bokgoni jwa go ithuta puo bo farologane le bokgoni jwa go fetolela.
Bafetoledi e tshwanetse go nna baakaretsi lwa ntlha, mme ba kgone go dira mo mefameng e e farologaneng, fela gape ba tshwanetse go tsenelela.
Go tlhokega maemo a a kwa godimo a bofetoledi fa e le gore mafapha a mmuso a tshwanetse go golagana ka bokgoni le batho ba ba direlwang.
Thulaganyo ya go thapa le go dirisa bafetoledi ba kwa ntle e tshwanetse go rebolwa Komiti ya Dithentara ya Lefapha.
TIRISO YA SEMOLAO
Pholisi e, e laolwa le go tshwanelwa ke dikatlanegiso tse di latelang -
Kgaolo ya bo 9 ya Melawana ya Botsholamatlotlo e e rebotsweng go ya ka Molao wa Tsamaiso ya Ditšhelete tsa Setšhaba, 1999 (Molao wa No. 1 wa 1999), o o amanang le mabaka otlhe a botsholamatlotlo;
karolo 217 Molaotheo wa Rephaboliki ya Aforika Borwa jaaka e akareditswe ke Letlhomeso la Pholisi ya Leakanyetso la Tshenkelo 2000 (Molao No. 5 wa 2000); le
Mokgwa wa Maitsholo wa Badiredi ba Setšhaba.
BOANAMO JWA TIRISO
Pholisi e ama -
badiri ka puo botlhe ba ba thapilweng ke mmuso, go akaretsa ba Lefapha la Botsweretshi le Setso;
bafetoledi botlhe ba ba ikemetseng ba mo konterakeng le mmuso;
badirelwa botlhe ba ba kopang ditirelo tsa phetolelo, tseleganyo le tshekatsheko ya ditirelo tse di tswang kwa mafapheng a mmuso.
BADIRELWA, DITOKOMANE LE DITSHENYEGELO
Mmuso, ka NLS/Di-LU, o tla tlamela badirelwa ba ba rileng ka ditirelo le go dirana le maphata a a farologaneng a ditokomane.
BADIRELWA
Tiro ya ntlha ya NLS/Di-LU e tla nna go bebofatsa tlhaeletsano magareng ga mmuso le setšhaba, le magareng ga Aforik Borwa le mafatshe a mangwe. Badirelwa ba mmuso o ba tlamelang ka ditirelo tsa phetolelo, tseleganyo le tshekatsheko ka jalo e tla nna -
Palamente;
mafapha a mmuso a bosetšhaba, go akaretsa ofisi ya Moporesidente;
ditheo tsa setšhaba;
mekgatlho ya molao/e e theilweng go latela molaotheo;
mafapha a mmuso kwa diporofenseng, segolo thata mabapi le dipuo tsa kwa moseja; le diembasi.
DITOKOMANE TSE DI AMOGETSWENG GO FETOLELWA, GO TSELEGANNGWA LE GO SEKWASEKWA
Ditokomane di tla fetolelwa go tswa le go ya kwa dipuong tsotlhe tsa semmuso. Ditokomane tsa dipuo tsa kwa moseja di tla fetolelwa ka Seesimane, le ditokomane tsa Seesimane kwa dipuong tsa kwa moseja ka fa go tlhokegang.
Ke ditokomane tsa mabaka a semmuso fela tse di tla amogelwang go fetolelwa, go tseleganngwa le go sekasekiwa ke NLS/Di-LU. Tsona di tla akaretsa -
Melao ya Palamente;
Melaotlhomo/Melaotlhomotheo (metheo ya melao e e tshisintsweng);
Peomolao ya tlaleletso (e tswa mo Melaong ya Palamente, jaaka melawana e e phasaladitsweng mo Kaseteng);
Dikitsiso tsa Mmuso le Dikgoeletso;
Pampiritsweu/Pampiritala (tse di tlhagisang dipholisi tsa mmuso, sekai: ka ga dintlha tsa ngwao-boswa);
dimemorantamo (tse di patileng Melaotlhomo, dimemorantamo tsa tumalano magareng ga Aforika Borwa le dinaga tse dingwe, kgotsa magareng ga mafapha a mmuso le setšhaba);
dipegelo (sekai: dipegelo tsa ngwaga le ngwaga, dipegelo tsa Khomišene ya Tirelo ya Setšhaba, dipegelo tsa dikhonferense);
dimanyuale (ditaelo kgotsa dibukana tse di baakantsweng ke mafapha a mmuso wa bosetšhaba mme di ikaeletswe go dirisiwa ke setšhaba ka kakaretso);
Ditumalano (sekai: ditumalano tsa tirisano, ditumalano tsa kgwebisano boditšhabatšhaba).
DITSHENYEGELO
Ditshenyegelo tsa phetolelo, tseleganyo le tshekatsheko ya ditokomane tse di welang mo mefameng e e kailweng mo go 7.2 e tla maikarabelo a NLS/Di-LU. NLS/Di-LU di ka dumela go bebofatsa phetolelo, tseleganyo le tshekatsheko ya ditokomane tse dingwe go na le tse, fela ditshenyegelo e tla nna maikarabelo a modirelwa.
TIRAGATSO
Tiragatso ya ditirelo tsa bofetoledi le botseleganyi di tla tsamaisana le ditheo tsa batho pele. Go netefatsa tiragatso e e bokgoni ya ditheo tse, mmuso o tla tshwara dipuisano tsa ngwaga le ngwaga le balekane le badirelwa ba one.
Khansele ya Badirisi ba Puo e tla tlhokomela katiso ya badirisi ba puo le go laola kabelo ya disetifikeiti le kwadiso ya bone.
Katiso e tla dirwa ka fa gare ke NLS/Di-LU, mme le dikhoso tse di rulagantsweng di tla rutiwa ke ditheo tsa thuto e kgolwane go tokafatsa bokgoni jwa bafetoledi le batseleganyi.
Tebang le ditokomane tsa kakaretso, mekgwa e e latelang e e tlwaelegileng ya tlhagiso e dirisiwa jaaka kaelo ya malatsi a neelo ya tiro:
Phetolelo (go akaretsa go sekaseka tiro ya gago)
Magareng ga mafoko a le 1 500 go fitlha go 1 750 (ditsebe tse 5 go ya go di le 5,5 tsa mafoko a le 300 tsebe nngwe le nngwe ) ka letsatsi;
Tshekatsheko
Magareng ga mafoko a le 2 000 go fitlha go mafoko a le 2 500 ( ditsebe di le 7 go ya go di le 8 tsa mafoko a le 300 nngwe le nngwe) ka letsatsi.
Tseleganyo
Magareng ga mafoko a le 3 000 to 3 300 s (ditsebe di le 10 go ya go di le 11 tsa mafoko a le 300 tsebe nngwe le nngwe) ka letsatsi.
Dinako tse tsa neelo di tla diragadiwa ka fa tlase ga maemo a a siameng. Mabaka a a nang le tlhotlheletso mo nakong ya neelo ke mofuta wa tokomane, maemo a botegeniki, boleng jwa tiro ya tshimologo, go nna teng ga dithanodi le manane a mareo, maemo a tlhomamo ya mareo le nako e e tlhokegang go dira dipatlisiso. Nako e e tsewang go tlhomola taolo ya boleng jwa tiro le /kgotsa go nna mo dikopanong tse di amanang le bofetoledi kgotsa botseleganyi jwa tokomane le yona e tla ama neelo.
MABAKA A KAMOGELO
Mabaka a go amogela dikopo go tswa go badirelwa ke a:
NLS le di-Di-LU di tla amogela dikopo tsa phetolelo, tseleganyo le tshekatsheko ya ditokomane tsa semmuso fela. Dikopo tse di poraefete ga di kitla di amogelwa.
Dikopo tsa go direlwa di tla lebisiwa go Tlhogo ya Lekala Ditirelo tsa Thuso(H/Aux), tlhogo (H/LU) ya lephata la puo e e maleba kgotsa baemedi ba bone ka go latelana. Badirelwa ga ba a tshwanela go lebisa ditokomane kwa go badira ka puo ba ka fa gare kgotsa bafetoledi ba kwa ntle ka tlhamalalo.
Fa tiro e romelwa kwa ntle, malatsi a neelo a a buisanetsweng magareng ga modirelwa, NLS/LU le mofetoledi wa kwa ntle yo o maleba a tshwanetse go kwalwa ka dinako tsotlhe.
Dikopo tsa phetolelo, tseleganyo le tshekatsheko di tshwanetse go atlanegisiwa ke batlhankedi ba ba supilweng mo mafapheng a bosetšhaba kgotsa a diporofense, ditheo tsa setšhaba le ditheo tsa semolao.
Dikopo di tshwanetse go neelwa mo foromong ya semmuso ya kopo (Z152), e e tshwanetseng go tladiwa ka botlalo, kgotsa ka lekwalong le le ditlhaka tsa lefapha la modirelwa.
Dikopo tsotlhe di tshwanetse go neelwa di tlantswe, segolo setona ka mokgwa eleketeroniki (ka emeile kgotsa mo disiketeng). Tokomane e tshwanetse go nna mo sebopegong se se fitlhelelwang ke NLS/Di-LU.
Ditokomane tse di jaaka Melaotlhomo, Melao le melawana e e tlhabolotsweng e tshwanetse go patiwa ke ditokomane tsa kwa tshimologong le dimametlelelo tsa Melaotlhomo, Melao le melawana ya go nna jalo.
Peomolao yotlhe le peomolaotlaleletso di tshwanetse go fetisiwa le Baeletsi ba Puso ba Molao go bona katlanegiso pele e romelwa go ka fetolelwa kgotsa le go tselegangwa.
Ke fela dikwalo tsa makgaolakgang jaaka di ikaeletswe go gatisiwa le go phasaladiwa di ka neelwang go fetolelwa.
Fa nngwe le nngwe ya ditlhokego tse e sa fitlhelelwa, ditokomane di tla busediwa go modirelwa.
THULAGANYO YA KAMOGELO YA DIKWALO
H/Aux kgotsa H/LU kgotsa baemedi ba bone ba tla amogela dikwalo tse di tsenang, mme ba tla netefatsa gore foromo e e maleba ya kopo e tladitswe ka botlalo le ka nepagalo.
Mokgwa wa go kwadisa dikopo o tshwanetse go latelwa ka tlhomamo go dirisiwa dikhoutu tse go dumalanweng ka tsona. Sekai: tokomane e ka fiwa tshupo ya Xho 03/0001/B. "Xho" e kaya gore puo e e fetolelwang mo go yona ke isiXhosa, "03" e kaya ngwaga wa ditšhelete, "0001" e kaya nomoro ya tokomane, mme "B" e supa mofuta wa tokomane, mo lebakeng le, Molaotlhomo.
Ka tirisano le tlhogo ya ditirelo tsa bofetoledi, H/Aux kgotsa H/LU o tla rerisanela letsatsi la neelo le modirelwa. Ditlhogo di tla ikgolaganya le badiri ka puo ba ba amegang pele ba dumalana ka letlha la neelo. H/Aux kgotsa H/LU, ka tirisano le mofetoledi wa kwa ntle, ba tla dumalana ka ga letlha le mofetoledi wa kwa ntle a tshwanetseng go neela tokomane ka lona. Se se tshwanetse go letla nako ya tshekatsheko ya boleng jwa tokomane.
H/Aux kgotsa H/LU o tla fetisetsa ditokomane kwa ditlhogong tsa phetolelo, ba ba tsayang maikarabelo a go fetisetsa ditokomane kwa mofetoleding yo o maleba wa selegae. Tiro ga e a tshwanela go newa bafetoledi ka tlhamalalo.
Ditlhogo tsa phetolelo di tla rwala maikarabelo a go netefatsa gore bafetoledi ba tshegetsa boleng le go neela tiro ka nako.
Fa go nang le tlhaelo ya go fetsa tiro ka nako, tlhogo e e maleba ya phetolelo e tla kopa H/Aux kgotsa H/LU go romela tokomane kwa bafetoleding ba kwa ntle. Dikopo tsotlhe tsa go romela ditokomane kwa ntle di tshwanetse go rebolwa ke Motsamaisi wa Lenane.
Direkhoto tsa ditokomane tsotlhe tse di amogetsweng le go fetisiwa ke NLS/Di-LU di tshwanetse go tsholwa di siame ka dinako tsotlhe. H/Aux kgotsa H/LU o tla rwala maikarabelo a go tlhokomela difalana (databases) tsa -
Ditokomane tsa dikwalo tse di amogetsweng go tselegangwa le go fetolelwa go tswa/ le go ya kwa dipuong tsa semmuso;
Ditokomane tse di amogetsweng go sekwasekwa le /kgotsa go fetolelwa go tswa/go ya kwa dipuong tsa kwa moseja; le
Bafetoledi ba ba atlanegisitsweng ba kwa ntle.
THOMELO YA DITOKOMANE KWA NTLE
Ditokomane di tla romelwa kwa bafetoleding ba ba atlanegisitsweng ba kwa ntle fa tlhokego e feta bokgoni jwa NLS/Di-LU kgotsa fa puo e e kopiwang e se teng mo NLS/Di-LU. Ditlhogo tsa phetolelo di tshwanetse go tlhaloso kwa go Motsamaisi wa Lenane go bona thebolelo pele di ka romelwa kwa ntle.
THULAGANYO YA THOMELO KWA NTLE
Fa go setse go tserwe tshwetso ya go romela ditokomane kwa ntle, thulaganyo e e tlhalositsweng fa tlase e tshwanetse go latelwa.
Ditokomane di tla romelwa kwa ntle go tswa ka ofisi ya H/Aux (NLS) kgotsa H/LU morago ga gore Motsamaisi wa Lenane a rebole tetla.
Motsamaisi wa Lenane o tla supa motlhankedi yo o nang le bokgoni go letla thomelo kwa ntle ya ditokomane tse di potlakileng, sekai: tsa ofisi ya Moporesidente, kgotsa dikopo tse di ka nnang le tlhotlheletso mo dikamanong tsa boditšhabatšhaba, fa ena a se teng.
Go latela ditshiamelo tsa Molao wa Thulaganyo ya, 1992 (Molao No. 122 wa 1992), batlhankedi ba mmuso ga ba a tshwanela go fetolela, go tseleganya kgotsa go sekaseka ditokomane dingwe le dingwe tse di rometsweng kwa ntle go duelelwa.
ngwaga mongwe le mongwe wa ditšhelete, botsamaisi jwa NLS/LU bo tla phasalatsa go laletsa bafetoledi ba ba ikemetseng go thentara go direla puso tiro ya go fetolela le go tseleganya. Ka motsi o bafetoledi ba kwa ntle ba ba neng reboletswe go dira tiro e ba tla kopiwa go netefatsa gore ba sa ntsane ba na le kgatlhego ya go tlamela ditirelo. Fa ba reboletswe tetla, mofetoledi yo o ikemetseng e tla nna mofetoledi yo o ikemetseng wa mmuso go fitlhela a rola tiro, kgotsa go fitlhela ditirelo tsa gagwe di emisiwa ke mmuso ka ntlha ya go se romele tiro e e kgotsofatsang ditlhokego tse di kailweng mo pholising ya dikaelo.
Go tla dirisiwa thulaganyo e e gagametseng go tlhopha le go sekaseka gore ke bafetoledi bafe ba kwa ntle ba ba tlametseng tirelo ya maemo a a kwa godimo mme ba tla newa setifikeiti sa tlotlomatso go ba akgolela diphitlhelelo tsa bone.
Botsamaisi jwa NLS/LU bo tshwanetse go netefatsa gore bafetoledi botlhe ba ba ikemetseng ba ba letleletsweng go fetolela ba tshwanetse go kgotsofatsa ditlhokego tsa Botsholamatlotlo jwa Bosetšhaba (National Treasury)tebang le go tshola ditokomane tsa semmuso le gore botlhe ba ba tshwanetse netefaletso ya bosireletsi jo bo maleba.
Morago ga tshekatsheko ya katlanegiso ya tlhogo ya bofetoledi, ke H/Aux kgotsa H/LU yo o ka tlhophang mofetoledi wa kwa ntle yo tiro e ka romelwang kwa go ene.
Tiro e tla romelwa bafetoledi ba ba ikemetseng ka mokgwa wa thefosano, mme go tla tlhokomelwa lenane la go refosanya diphetolelo magareng ga bafetoledi ba ba ikemetseng, go lebeletswe go nna teng ga bone le mefama ya bokgoni le botseneledi jwa bone. Bafetoledi botlhe ba ba ikemetseng ba tshwanetse go newa tšhono, mme diphetogo go tswa mo thulaganyong ya tatelano di tshwanetse go tlhalosiwa ka mabaka a a utlwalang le go rebolwa ka nako.
Ga go netefaletso epe e e tla neelwang mofetoledi yo o ikemetseng/boemedi ke motlhankedi mongwe le mongwe wa NLS/Di-LU gore tiro e tla romelwa kwa go ene. Netefaletso nngwe le ya mofuta oo e tla tsewa e le tlolomolao ya motlhankedi yo o amegang, mme go tla tsewa dikgato kgatlhanong nae go latela thulaganyo ya dikgato-kgalemo tsa mmuso.
Tiro e tla romelwa fela kwa bafetoleding ba ba ikemetseng ba ba atlanegisitsweng semmuso. Fa go sena mofetoledi yo o ikemetseng kgotsa a sa kgone go ka dira tiro e e rileng, go tshwanetse ga bonwa tetla e e kwadilweng go tswa kwa go Motsamaisi le Lanane go romela tiro kwa go mofetoledi kgotsa /boemedi jo bo ikemetseng, ka go sala morago thulaganyo e e tlwaelegileng ya go bona thuso.
Mmuso o na le dithata tsa go fedisa ditirelo tsa bafetoledi ba ba ikemetseng kgotsa go tlosa maina a bone mo sefalaneng fa tiro ya bone e sa kgotsofatse dithulaganyo tsa boleng jaaka di tlhalositswe mo temaneng ya 14.1. Mabaka le Maemo a Kakaretso a Boto ya Dithentara tsa Puso (ST36) le Dikaelo go mafapha tebang le Tshenkelo (ST37) a tla diragatswa.
Bafetoledi ba ba ikemetseng ba tla duelwa ka mokgwa o o latelang:
Phetolelo: palo ya mafoko mo temaneng ya Seesimane, go sa kgatalesege gore ke temana ya tshimologo kgotsa e e lebilweng, ka tuelo ya kelo ya thentara ya phetolelo (R/100 mafoko), fela e seng ka fa tlase ga R40/100 mafoko;
Tseleganyo: palo ya mafoko a temana ya tshimologo ka tuelo ya kelo ya thentara ya tseleganyo, fela e seng ka fa tlase ga R20,00/100 mafoko;
Tshekatsheko: palo ya mafoko a ditemana ka bobedi ka kelo ya thentara ya tshekatsheko, fela e seng ka fa tlase ga R30,00/100 mafoko.
Temana 17.1 ya ST36 e kaya fa dituelo tse di tlhomameng kgotsa tse di sa tlhomamang di ka thentaria, fa temana ya 17.2 e letla tshiamelo ya go baakanya dituelo ka tiriso ya mokgwa mongwe. Go bonwa go le botoka gore go thentariwe dituelo tse di tlhomameng.
Fa thebolo e setse e bonwe go tswa kwa go Motsamaisi wa Lenane, foromo Log 1 e e saennweng (bona temana 12.1.16 tebang le tshedimosetso e e tshwanetseng go neelwa) e tshwanetse go romelwa kwa Tlhatlhamanong ya Theleso (Supply Chain) le Botsamaisi jwa Dithoto(SCAM), jo bo tla dirang le go romela foromo ya thomelelo ya semmuso kwa go mofetoledi yo o ikemetseng.
H/Aux kgotsa H/LU o tla romela tokomane le lekwalo la taelo kwa go mofetoledi yo o ikemetseng.
Lekwalo la taelo le kopo ya tumelelo a tshwanetse go nna le dintlha tse di latelang:
Leina le aterese ya mofetoledi yo o ikemetseng;
letlha;
setlhogo le nomoro ya rejisetara ya tokomane;
puo ya tshimologo le puo e e lebilweng ya tokomane;
mofuta wa tiro e e tshwanetseng go dirwa, k.g.r. phetolelo, tseleganyo le /kgotsa tshekatsheko;
palo ya mafoko (fa modirelwa a sa romela palo ya mafoko, tokomane e tshwanetse go sekeniwa go tlhomamisa palo ya mafoko);
keletefo e e maleba; le letlha la neelo.
DITLHOKEGO TSA BAFETOLEDI BA BA IKEMETSENG
Bafetoledi ba ba ikemetseng le baemedi ba ba amogelang tiro go tswa kwa NLS/Di-LU ba tshwanetse go kgotsofatsa ditlhokego tse di latelang:
Batho ba ba dirang jaaka bafetoledi ba ba ikemetseng ga ba a tshwanela go fetisetsa tiro nngwe le nngwe e amogetsweng kwa NLS/Di-LU kwa go motho yo mongwe.
Baemedi le dikgwebopotlana tse dinnye (cc) di tshwanetse go itsise dintlha tsa bafetoledi ba tsona, mme ba romele lokwalo-ikitsiso (curriculum vitae) la motho mongwe le mongwe yo o ba direlang.
NLS/Di-LU e itlama go se dirisane ka tlhamalalo le bafetoledi ba ba kailweng mo temaneng ya 13.2, fela e tla dirisana le baemedi kgotsa kgwebopotlana e e ba thapileng.
Tiro e e feditsweng e tshwanetse go dumalana le mokgwa wa dikaelo tse di neetsweng ke NLS kgotsa di-LU (sekai: khopi ya pampiri le /kgotsa khopi ya eleketeroniki, Microsoft Word, saese ya ditlhaka, diphatlha fa gare ga mela j.j.) jaaka go kailwe mo lekwalong la taelo. Go se ka ga bewa dikganedi tsa tshireletso mo tirong e e feditsweng, ka gonne tiro eo e nna thoto ya lefapha le le amegang.
Tiro e e feditsweng le dikwalo tsa tshimologo (fa e le phetolelo, tseleganyo le tshekatsheko) di tshwanetse go busediwa kwa NLS/di-LU gammogo le lenanetuelo (invoice) le le kayang palo ya mafoko a a fetoletsweng, a a tselegantsweng kgotsa a a sekasekilweng jaaka go kailwe mo lekwalong la taelo. Nomoro ya topo ya semmuso e tshwanetse go tlhagelela mo lenane-tuelong.
Tiro e e neetsweng morago ga letsatsi la neelo e tla nna le kotlhao ya diperesente di le nngwe bosomenneng (1/14%) jwa boleng jwa tiro yotlhe e e neetsweng, e balelwa letsatsi lengwe le lengwe morago ga letlha la neelo, ntle le fa letlha la neelo le atolositswe ka tumalano e e dirilweng go sa le gale magareng ga H/Aux kgotsa H/LU, modirelwa le mofetoledi yo o amegang. Le gale, fa letlha la neelo le tshwanetse go okediwa ka diura tse di fetang 24, memorantamo o kopang tetla ya katoloso ya letlha o tshwanetse go neelwa SCAM.
Bafetoledi ba ba ikemetseng ba tshwanetse go neela setifikeiti sa kgololo ya lekgetho go tswa go Tirelo ya Lekgetho ya Aforika Borwa (SARS) le go neela dinomoro tsa bone tsa ikwadiso ya lekgetho mo foromong ya kopo ya thentara.
Bafetoledi ba ba ikemetseng ba tshwanetse go tshola dikhopi tsa tiro nngwe le nngwe e e buseditsweng kwa NLS/Di-LU sebaka sa ngwaga o le mongwe morago ga go fetsa tiro, e le mokgwa wa tshireletso kgatlhanong le kgonagalo ya go timela ga tiro.
Dithata tsa thoto ya botlhale tsa tiro e e fetoletsweng, e e tselegantsweng kgotsa e e sekasekilweng e buseditswe kwa ke mofetoledi yo o ikemetseng, di tla fetela kwa NLS/Di-LU NLS/LU le go nna le yona.
TAOLO YA BOLENG
Ka ntlha ya mabaka a taolo ya boleng, bafetoledi ba selegae ba tshwanetse go netefatsa boleng jwa tiro tebang le boleng go ya ka dintlha tse di latelang:
go felela ga tiro;
tiriso ya mareo a a nepagetseng, a a tlhomamisitsweng;
tiriso ya mareo ka tlhomamo;
tumalano le mopeleto wa semmuso; le boammaruri jwa bokao jwa tema ya tshimologo.
Tshekatsheko sampole, k.g.r. tshekatsheko ya ditsebe tsa tokomane fale le fale, e tla dirwa go netefatsa boleng. Fa boleng bo sa kgotsofatse maemo a a batlegang, mofetoledi wa selegae kgotsa motho yo o nonofileng sentle yo o mo konterakeng ya mabaka ao le NLS/Di-LU o tla tseleganya phetolelo ka botlalo, mme NLS/Di-LU e ka tsaya dikgato jaaka go tlhagisitswe mo temaneng ya 12.1.11.
Fa puo e sa tlamelwa ka mofetoledi wa selegae, NLS/Di-LU e tla romela tokomane e e amegang kwa ntle tebang le tlhokomelo ya boleng, go ya ka thulaganyo e e tlwaelegileng ya tshenkelo, kwa go mofetoledi yo o nang le borutegi le maitemogelo a a maleba yo o tla netefatsang boleng jwa ka mokgwa wa tshekatsheko ya sampole. Tebang le se, go tla tsewa ditsebe fale le fale go tswa mo tokomaneng. Palo ya ditsebe tse di sekasekilweng e tshwanetse go nna kana ka 10% ya ditsebe tsotlhe tsa tokomane, sekai: ditsebe tse di 10 tsa tokomane ya ditsebe gi le 100 di tshwanetse go sekasekiwa.
Pele go ka duelwa, mofetoledi wa selegae yo o maleba o tshwanetse go netefatsa boleng jwa tiro e e amogetsweng go tswa kwa mofetoleding yo o ikemetseng ka go saena foromo ya netefaletso ya tuelo.
Foromo ya ditshwaelo e tla tsamaya le phetolelo nngwe le nngwe, e ka tswa e fetoletswe ke mofetoledi wa selegae kgotsa mofetoledi yo o ikemetseng, fa e busediwa kwa go modirelwa. Modirelwa o tla tlatsa foromo e, mme a e busetse kwa go H/Aux kgotsa H/LU, yo o tla begelang Motsamaisi wa Lenane gangwe mo dikgweding di le tharo.
TSAMAISO YA DITUELO
Tsamaiso ya dituelo go bafetoledi ba ba ikemetseng e tla dirwa jaana:
Tiro e e feditsweng gammogo le foromo ya setifikeiti sa netefaletso ya tuelo, se saennwe ke mofetoledi wa selegae le lenanetuelo di neelwa H/Aux yo o tla netefatsang nepagalo ya lenanetuelo. Nomoro ya semmuso ya topo e tshwanetse go tlhagelela mo lenanetuelong.
Ke maikarabelo a ditlhogo tsa bofetoledi go kganela dituelo tse se nang mosola, tse di tletseng tshenyo, ditshenyegelo tse di sa rebolwang le tse di sa tlhomamang.
Ga go na tuelo epe e e tla fetisiwang ntle le tshaeno ya H/Aux kgotsa H/LU le Motsamaisi wa Lenane.
foromo ya netefaletso ya tuelo le lenanetuelo di tshwanetse go romelwa kwa SCAM go duela.
Dipotso dingwe le dingwe go tswa go bafetoledi ba ba ikemetseng, tse di amanang le tuelo tsa tiro e e dirilweng, di tshwanetse go lebiswa kwa go H/Aux kgotsa H/LU.
TLHABOLOLO
Pholisi e tla tlhabololwa ke NLS fa go tlhokega, mme banni-le-seabe botlhe ba tla itsisiwe ka ga ditlhabololo tsa go nna jalo.
LENANEFOKO
Tebang le tiriso ya tokomane e -
Tshekatsheko" le kaya papiso ya temana mo puong ya ntlha le phetolelo ya yona mo puong ya bobedi, le paakanyo ya temana ya bobedi;
Molaotheo" le kaya Molaotheo wa Rephaboliki ya Aforika, 1996 (Molao No. 108 wa 1996);
setheo sa molaotheo" le kaya setheo se se theilweng go ya ka Molaotheo;
tseleganyo" le kaya paakanyo ya diteng, mokgwa le thutapuo ya temana;
mofetoledi yo o ikemetseng" le kaya motho kgotsa moemedi yo o tseneng mo konterakeng le NLS/di-LU go fetolela, go tseleganya le go sekaseka ditokomane tsa semmuso;
LU" le kaya Lekala la Puo;
NLS" le kaya Tirelo ya Bosetšhaba ya Dipuo;
ditokomane tsa semmuso" le kaya ditokomane tse di tshwanetseng go dirisetswa mabaka a semmuso go na le a motho ka nosi;
pholisi" le kaya Pholisi ya Dikaelo tsa Bofetoledi le Botseleganyi tsa NLS;
Motsamaisi wa Lenane " le kaya motlhankedi wa mmuso yo o seng ka fa tlase ga Mokaedi ka maemo, yo o rweleng maikarabelo a Lenane le le rileng, sekai: bokaedi.
tirelo ya setšhaba" le kaya tirelo ya mmuso wa bosetšhaba kgotsa lekgotla, khomišene, setlamo, koporasi, letlole kgotsa sediriswa (se e seng kgwebo ya bosetšhaba) e e theilweng go ya ka peomolao ya bosetšhaba, e duletswe ka botlalo kgotsa bontlhabongwe ke mmuso, mme e ikarabela kwa Palamenteng;
puo ya tshimologo" le kaya puo e tokomane e kwadilweng ka yona kwa tshimologong;
puo e e totiilweng" le kaya puo e tokomane e tshwanetseng go fetolelwa kwa go yona;
phetolelo" le kaya phetolelo ya tema go kwa puong ya tshimologo go ya kwa puong e e totilweng;
mofetoledi" le kaya motho yo o fetolelang ditokomane go tswa mo puong ya tshimologo go ya kwa puong e e totilweng, mme le akaretsa motseleganyi kgotsa mosekaseki, ntle le fa tiriso e kaya ka mokgwa mongwe.
